तेहरान । अमेरिका–इजरायलले फेब्रुअरी २८ मा इरानमाथि आक्रमण गरेपछि पश्चिम एसिया यतिबेला युद्धको चपेटामा परेको छ ।
आफूमाथि भइरहेको आक्रमणको प्रतिकारमा इरानले पनि इजरायल र खाडी क्षेत्रमा अमेरिकी सेनाको आधार शिविरमाथि आक्रमण गरिरहँदा क्षेत्रका विभिन्न देशहरूमा मर्नेको संख्या निरन्तर बढिरहेको छ ।
इरानस्थित अमेरिकी मानवअधिकार समूह एचआरएएनएको पछिल्लो प्रतिवेदनकाअनुसार हालसम्म ३ हजार ४९२ जनाको मृत्यु भइसकेको छ । तीमध्ये १ हजार ५७४ जना सर्वसाधारण रहेका छन् । मृत्यु हुनेमा कम्तीमा २३६ जना बालबालिका रहेको बताइएको छ । इजरायलमा पनि मिसाइल आक्रमणबाट १९ जनाको मृत्यु भएको मेगन डेविड एडोम एम्बुलेन्स सेवा (एमडीए)ले भनेको छ ।
इजरायली रक्षा बल (आईडीएफ)ले बताएअनुसार दक्षिण लेबनानमा भएका झडपहरूमा नौ जना इजरायली सैनिक मारिएका छन् । लेबनानको स्वास्थ्य मन्त्रालयका अनुसार इजरायलको आक्रमणमा परेर १ हजार २४७ जनाको मृत्यु भइसकेको छ । मर्नेमा १२४ जना बालबालिका रहेको बताइएको छ ।
युद्धको चपेटामा परेर खाडीका अन्य विभिन्न देशहरूमा पनि कम्तीमा २४ जनाको मृत्यु भइसकेको छ । तीमध्ये धेरैजसो सुरक्षा निकायका सदस्य वा विदेशी कामदार रहेका छन् । संयुक्त अरब इमिरेट्समा मात्रै ११ जनाको मृत्यु भएको छ । त्यस्तैगरी, कुवेतमा सात जनाको मृत्यु भएको छ भने ओमान, साउदी अरब र बहराइनमा पनि दुई–दुई जनाको ज्यान गएको छ ।
